Guude,
isch hab Ihrne Ihr Adress von nem Kumbel
gekrischt un vielleischt habbe se ja ebbes
für misch, z.B. als Hausmaaster.
Isch heiß Karl-Heinz Gebbard, die Kumbels
nenne mich allerdings Schobbe.
Geborn bin isch am 25.10.55 in Hanau. Isch
seh zwar älter aus, aber isch war auch lang
krank.
Mei Schulaubildung is 12 Jahr Grundschul
Groß-Krotzebosch mit anschließender
Lehre als Feinmeschaniker,
Einzelhandelskaufmann un dann Gas-Wasser
Installateur. Die erste zwei warn nix, die
dritt hab isch dann 1989 abgeschlosse.
Dadenach war isch korz für 5 Jahr net
verfüschbar (isch will net drübber redde,
dumm Sach - vergesse beim Aldi
zu bezahle...).
Isch bin handwecklisch äußest geschickt un
deschnisch wersiehrt und hätt auch grad
Zeit, da mein letzter Chef net mit mir
zurechtgekomme is. Dazu muß isch saache, daß
isch hin und widder gerne mal ein zwitscher,
aber net uff de Abbeit, höschsten in de
Frühstückspaus und Mittagspaus, unn aach e
klaa Kaffepaus werd ja wohl drin sein. Mer
werd ja aach viel ruhischer nach so em
klaane Hütsche, Sie wisse schon, gell?!
Aber zurück zu dem Grund von
meim Schreibe. Isch such Abbeit. Jetzt aach
net grad so rischtich was Schweres (mer werd
ja net jinger, gell), eher sowas mit
beuffsischtische von Wohnunge unn
Schigganiern von Leut, die wo da drin wohne
-des kann isch gut.
Des letzte mal war isch aach Hausmaaster
innem Hochhaus, unn isch hab mer da
so e paar Fertischkeide angeeischnet, die wo
mir bei Ihne helfe könnt.
Isch kann sehr gut:
- Über de Hof brülle
- Kinner vom Rase verscheusche
- Autos uffschreibe die uffem falsche
Packplatz steje
- Fußbäll oikassiere
- Türn uffschtemme
- Im Keller rummgeistern
- Putzplän kontrolliern
- Schmierfinke bei de Polizei abliffern
- Auslänner trietze
- Leut anmosern
- un sowas alls
Isch dät misch freue, wenn Sie mir
Geleschenheid gäbe däte misch emal
persöhnlisch vorzustelle.
(Isch dät auch e klaa Likörsche mitbringe -
da babbelt sisch leichter, gell).
Ansonsten verbleib isch
Ihne Ihrn Karl-Heinz Gebbard
PS. Vor 11:00 gehts net, da hab isch
Frühschobbe